“Kryeministër, ju do të mbaheni në mend me politikën tuaj për zbrazjen dhe eksodin më të madh që ka ndodhur në Kosovë”. Iu drejtua kështu, shefi i Grupit Parlamentar të Aleancës për Ardhmërinë e Kosovës, Besnik Tahiri, kryeministrit të vendit, Albin Kurti.
Njëherit, Tahiri pyeti deputetët pse gjatë diskutimit për buxhetin e vitit 2024, asnjëri nga ta nuk i përmendi pensionistët.
“A mund ta dimë pse është bartur ky buxhet në buxhetin e vitit 2024. Ju dëshironi që këto mjete që I keni bartur vit pas viti, t’i shfrytëzoni në vitin e fundit të qeverisjes. A mund të më tregoni pse askush prej juve nuk e përmendi fjalën “pensionist”. Të gjithë pensionistët janë nën mëshirën tonë. Kryeministër ju do të mbaheni në mend që keni fituar 50 përqind, por ju do të mbaheni në mend për politkën tuaj për zbrazjen dhe eksodin më të madh që ka ndodhur në Kosovë, për shkak se ky buxhet e kjo qeverisje, asnjë çështje se ka ngritur”, potencoi Tahiri para deputetëve në Kuvend.
Më tej, kreu i AAK-së, vlerësoi që debati i sotëm parlamentar, është ekspozeja më e dobët e Kurtit në tri vitet e fundit të qeverisjes.
