Për afër 18 vjet ndodhej në burgjet e Kosovës.
Por, Faton Hajrizi, të shtunën zgjodhi që lirinë t’ia fal vetës edhe një herë.
Ky i fundit për të 9-ën herë, iku nga duart e shtetit.
Një veprim të tillë e përsëriti në orët e para të së shtunës, në Qendrën Korrektuese në Smrekonicë të Vushtrrisë.
Në kohën kur u mobilizua shteti ta kërkonte, Faton Hajrizi u shfaq vet.
Ky përmes rrjeti social “TikTok” tha se ndodhej jashtë vendit.
Faton Hajrizi ishte i dënuar me 25 burgim për vepra të ndryshme penale.
Ndërsa nga Shërbimi Korrektues i Kosovës, kanë treguar arsyen se pse një i burgosur i tillë, ndodhej në një burg me sigurinë më të ulët.
“Gjatë qëndrimit në Qendrën Korrektuese në Dubravë, ai ka përfunduar shkollimin e mesëm të lartë, ka marrë pjesë në programe rehabilituese dhe aktivitete rekreative. Bazuar në këto sjellje, ai ka kaluar në trajtim të avancuar dhe ka realizuar disa herë të drejtën e pushimit jashtë institucionit korrektues. I dënuari kishte kërkuar transferim në Qendrën Korrektuese në Smrekonicë, dhe bazuar në raportet profesionale, ai ka treguar sjellje të mira dhe ishte në proces të avancuar të risocializimit”, thuhet nga SHKK.
Por, avokatët konsiderojnë që vendimi i transferimit të personave të tillë si rasti i Hajrizit duhet të merret me shumë kujdes.
“Gjykatat dhe organet që merren me zbatimin e ligjit duhet të jenë më vigjilente në këtë aspekt, dhe t’i studioje shumë më mirë rrethanat dhe mos t’ia falin besimin personave të caktuar të cilët pastaj mund të na sjellin në kësi situate. Vet fakti që ai është arratisur nga burgjet e larta të sigurisë, është një indikacion që ai këtë mund ta bëj prapë”, ka thënë avokati Arbër Jashari.
Lidhur me rastin e Hajrizit, SHKK ka bërë të ditur se janë pezulluar dy zyrtarë korrektues, pasi nuk e vërejtën në kohë largimin e të dënuarit.
