Shoqata Bamirëse Humanitare “Bereqeti” e cila funksionon në kuadër të Bashkësisë Islame të Kosovës, ka reaguar pas pamjeve të publikuar nga Komuna e Prishtinës, ku shihet se disa mbeturina të mbetura pas iftarit të shtunën janë shpërnda nëpër hapësira publike.
Nga kjo shoqatë kanë shprehur keqardhje për situatën, ndërsa kanë shtuar se mbeturinat janë hedhur ne thasë pastrimi
Sipas tyre, ato gjatë natës janë grisur nga qentë endacakë
“Me këtë rast sqarojmë se ne si organizatorë, menjëherë pas përfundimit të iftarit, aktivistët tanë kanë marrë të gjitha masat e nevojshme për pastrimin e sheshit, si dhe të gjitha mbetjet nga iftari janë futur në thasë pastrimi. siç hidhet në kontejnerët më të afërt. Por, gjatë natës janë grisur qeset e pastrimit nga qentë endacakë dhe është krijuar ajo pamje, e cila nuk është e mirë për të gjithë ne. Edhe një herë ju kërkojmë falje të gjithëve dhe shprehim premtimin se herë të tjera gjëra të tilla nuk do të përsëriten”, thuhet në reagim.
Komuna e Prishtinës ka publikuar disa fotografi të sheshit “Adem Jashari”, ku shihen se shumë qytetarë kanë lënë mbeturinat që kanë ngrënë iftar, të shtunën mbrëma.
Komuna thotë se personat që kanë lënë mbeturina në këto hapësira do të gjobiten nga organet përgjegjëse.
