Drejtoresha e Qendrës Kosovare për Rehabilitimin e të Mbijetuarve të Torturës, Feride Rushiti, tha se viktimat e dhunës seksuale, me çdo kusht duhet të integrohen në tregun e punës.
Më tej, Rushiti tha se të njëjtit, ende nuk marrin shërbime shëndetësore falas.
“Të flasim edhe për të drejtat të cilat nuk janë adresuar në ligj. Shumica e këtyre grave dhe burrave kanë pasoja të panumërta shëndetësore, qoftë në raport më plagët e luftës, qoftë për shkak të dimensionit të traumës, kanë të zhvilluara sëmundje të ndryshme. Kështu që, shërbimet shëndetësore nuk janë të pasqyruara në ligj, ata nuk marrin shërbime shëndetësore falas. Ata duhet të punojnë, janë një grup i cili do tretman të merituar, duan të integrohen në tregun e punës. Pra, nuk është vetëm aspekti psiko-social e shëndetësor, duhet integrimi I tyre ekonomik të jetë një prioritet për ta”, deklaroi Rushiti në emisionin “Infonata”.
E nën emocione të shumta, Rushiti tregoi se sa ka qenë e vështirë për t’i dëgjuar rrëfimet e grave dhe burrave të dhunuar.
“Secila histori në organizatë, e sjellë një format të luftës. Secila në vetvete e ka një lloj torture apo formë brutaliteti që nuk është e lehtë të përballohet, e aq më shumë kur ajo të kthehet në periudhë 20-vjeçare më vonë. Me kalimin e kohës, i gëzohemi tash grave dhe burrave që kanë arritur t’i mbijetojnë asaj traume”, shtoi tutje Rushiti në Tëvë1.
E pyetur se a ka dështuar Kosova si shtet t’i dokumentojë krimet e luftës, Rushiti u shpreh optimiste, teksa tha që beson në mekanizmat e shtetit.
“Jemi të vonuar, por është mirë që e kemi këtë mekanizëm të shtetit, e të bëjnë çmos që shoqëria kosovare, organizatat, të gjitha mekanizmat që janë marrë me dokumentimin e krimeve të luftës, pas luftës në Kosovë, të bashkëpunojnë dhe ta krijojnë një arkiv e cila i shërben Kosovës”, tha ndër të tjerash ajo./teve1.info/.
