Kryeministri i vendit, Albin Kurti, ka ofruar mbështetjen e tij në realizimin e projekteve infrastrukture në Komunën e Podujevës.
Gjatë vizitës së sotme në Podujevë, Kurti dhe kryetari i kësaj komune, Shpejtim Bulliqi, kanë diskutuar rreth projekteve infrastrukturore, për zonën industriale, magjistralen Prishtinë-Podujevë, impiantin e ujërave të zeza dhe liqenin e Pollatës, përcjell teve1.info.
“Gjatë vizitës që po i bën sot Komunës së Podujevës, ku edhe u lansua programi shtetëror “Sport në Shkolla” në Shkollën “Xheladin Rekaliu”, Kryeministri i Republikës së Kosovës, Albin Kurti, është pritur nga Kryetari i Komunës, Shpejtim Bulliqi, në ndërtesën e Komunës. Në këtë takim u diskutua për projektet infrastrukturore në Komunë, si ai i Zonës Industriale, magjistralen Prishtinë-Podujevë, impiantin e ujërave të zeza e liqenin e Pollatës. Kryeministri Kurti ka ofruar mbështetjen e tij dhe të qeverisë në realizimin e projekteve infrastrukturore, projekte këto që ndikojnë drejtpërdrejt në përmirësimin e jetës së qytetarëve të kësaj komune”, thuhet në komunikatë.
Me këtë rast, kryeministri u njoftua nga Bulliqi për punën dhe rezultatet e qeverisjes, me theks te disa nga projektet që po realizohen dhe disa që janë përfunduar sikurse Urgjenca e Qytetit, stacioni i autobusëve, rikonstruktimi i disa rrugëve brenda qytetit, ndër to rruga “Skenderbeu” dhe “Hakif Zejnullahu”, dhe ndërtimi i çerdheve të reja.
Nga aty, Kurti së bashku me Bulliqin kanë vijuar agjendën e ditës për në ceremoninë e vënies së gurthemelit për projektin e Qendrës Rezidenciale për të moshuar në Komunën e Podujevës./teve1.info/.
