Kryeministri i vendit, Albin Kurti, ka pritur sot në takim zëvendësdrejtorin e Përgjithshëm të Policisë së Kosovës, Fehmi Hoti dhe përfaqësues e pjesëtarë të Njësisë Speciale dhe Intervenuese të Policisë së Kosovës.
Gjatë këtij takimi, Kurti ka theksuar përkushtimin e Qeverisë për përmirësimin e kushteve dhe pajisjeve të punës për Policinë e Kosovës, derisa ka thënë se ky përkushtim reflektohet në projektbuxhetin e vitit 2024, në të cilin parashihet shtimi i investimeve kapitale.
“Kryeministri i Republikës së Kosovës, Albin Kurti së bashku me ministrin e Punëve të Brendshme, Xhelal Sveçla dhe ministrin e Financave, Punës dhe Transfereve, Hekuran Murati takuan sot zëvendësdrejtorin e Përgjithshëm të Policisë së Kosovës, Fehmi Hoti dhe përfaqësues e pjesëtarë të Njësisë Speciale Intervenuese të Policisë së Kosovës. Gjatë takimit, kryeministri Kurti i njoftoi ata se kategorizimi dhe vlera e shtesave të rrezikshmërisë për pjesëtarët e Policisë së Kosovës është bërë me kujdes të veçantë e të shtuar, duke marrë në konsideratë të gjithë faktorët rreth punës dhe përgjegjësive të tyre, por në të njëjtën kohë duke pasur parasysh edhe kufizimet që ekzistojnë. Qeveria e Republikës së Kosovë është e përkushtuar për përmirësimin e kushteve dhe pajisjeve të punës për Policinë e Kosovës në mënyrë që krahas lehtësimit në punë, të ndikojë drejtpërdrejt po ashtu në uljen e rrezikshmërisë gjatë kryerjes së detyrave dhe përgjegjësive. Ky përkushtim reflektohet edhe në projektbuxhetin e Ministrisë së Punëve të Brendshme për vitin 2024 në të cilin parashihet shtimi i investimeve kapitale në Policinë e Kosovës”, thuhet në komunikatë.
Po ashtu, thuhet se Kurti nën shoqërinë e ministrit të Punëve të Brendshme, Xhelal Sveçla dhe ministrin e Financave, Punës dhe Tranfereve, Hekuran Murati, fillimisht kanë dëgjuar me vëmendje të gjitha kërkesat dhe çështjet e ngritura nga pjesëtarët e Policisë së Kosovës, teksa kanë falënderuar për kontributin e tyre./teve1.info/.
