Ish-drejtori i Policisë së Kosovës, Rashit Qalaj, thotë se Agjencia e Kosovës për Inteligjencë (AKI), ka dështuar si institucion, sa i përket sulmit të fundit në fshatin Banjskë.
Në kuadër të diskutimit për sulmin terrorist në Banjskë, Qalaj vlerësoi se AKI-ja është dashur të ketë informata paraprake për atë që ka ndodhur.
“A ka dështuar ndonjë institucion i Kosovës, a po jo? Fjalën e kam për AKI-në. AKI-ja e ka punë primare këtë gjë, është dashur dhe duhet të kenë informata paraprake se çka po ndodhë. Faktet po tregojnë që këtu diçka ka çaluar dhe më shumë e adresoj këtë çështje te AKI-ja, për shkak se misioni i saj është i tillë. Ndërsa Inteligjenca e Policisë, është kryesisht inteligjencë kriminale. Ndërsa, rasti i fundit në veri më shumë i adresohet AKI-së. Është e pamundur që në raste të tilla të mos kenë informata”, deklaroi Qalaj në emisionin “Këndi i Debatit”.
Madje, Qalaj pretendoi se grupi terrorist kishte planifikuar një masakër brenda Manastirit, me idenë që t’i hidhet faji pastaj organeve kosovare, raporton teve1.info.
“Mendoj që nuk ka qenë caku të sulmohet patrulla e Policisë”, theksoi tutje Qalaj në Tëvë1.
Kujtojmë se Policia e Kosovës është sulmuar me arsenal armësh, përfshirë këtu edhe me granata dore dhe zollë, ku si pasojë e gjuajtjeve një polic është vrarë dhe një tjetër është plagosur.
Sulmet ndaj policisë kanë ndodhur në orët e hershme të mëngjesit më 24 shtator në fshatin Bajnskë.
