Presidentja e vendit, Vjosa Osmani, në seancën solemne të Kuvendit për nder të Pavarësisë, ka përmendur sulmin e 24 shtatorit në Banjskë, teksa tha se Kosova vazhdon të jetë e vendosur në reagimin e saj ndaj agresionit shtetëror serb.
Gjatë fjalimit të saj, Osmani tha se përkundër situatave të krijuara, prezenca ushtarake policore e Serbisë në Kosovë, ka përfunduar në qershor të vitit 1999.
“Në mëngjesin e hershëm të 24 shtatorit të vitit 2023, Kosova u sfidua sërish nga hegjemonia e përtej kufirit verior. Agresioni ndaj shtetit tonë dhe sulmi terrorist paramilitar i organizuar e mbështetur nga Serbia, tregon se reja hegjemone vazhdon ta mbulojë qiellin mbi Serbinë. Ajo e mban regjimin politik në atë vend të zhytur në errësirën e së kaluarës. Reagimi ynë ndaj agresionit shtetëror serb, ishte i vendosur dhe iu siguroj që i tillë do të jetë çdo herë. Le të jetë e qartë, prezenca ushtarake policore e Serbisë në Kosovë, ka përfunduar njëherë e përgjithmonë në qershor të vitit 1999, kur qiellin e Kosovës e pushtoi fryma e lirisë”, deklaroi Osmani.
Po ashtu, presidentja potencoi se Kosova është e do të mbetet e lirë, sovrane dhe e zonja që së bashku me aleatët e saj ta mbajë të palëkundur paqen në rajon.
Më tej, ajo tha se 17 shkurti është e arritura më e madhe historike e Kosovës, duke shtuar se kjo e liri e tashme, ka qenë gjithmonë sakrificë për qytetarët e vendit.
“17 shkurti është e arritura jonë më e madhe historike. Për qytetarët e Kosovës të ketë shtet, ka qenë gjithmonë sakrificë e ideal. Përkundër vështirësive shekullore, ne rezistuam dhe e mbajtëm kokën me shumë krenari e vendosmëri lart. Është koha të kthehemi pas, e të shikojmë rrugëtimin tonë, përpjekjen e palëkundur për liri dhe t’i kujtojmë ata që e mbajtën të gjallë idealin për shtetin”, shtoi tutje Osmani./teve1.info/.
