Kryetari i Kuvendit, Glauk Konjufca, ka takuar Delegatin Apostolik të Vatikanit, Imzot Jean Marie Speich.
Gjatë takimit, Konjufca ka deklaruar se raportet e Kosovës me Selinë e Shenjtë kanë qenë gjithmonë miqësore, madje se ato duhet të shkojnë drejt njohjes reciproke si shtete,
Po ashtu, kryekuvendari ka shprehur vlerësimin e tij për avancimin e marrëdhënieve mes Vatikanit dhe Kosovës, tashmë edhe me themelimin zyrtar të Misionit të Veçantë të Kosovës në Selinë e Shenjtë.
“Raportet e Kosovës me Selinë e Shenjtë kanë qenë gjithmonë miqësore dhe ato duhet të shkojnë drejt njohjes reciproke si shtete”, ka thënë Konjufca.
Të dyja palët shprehën konsideratën mbi kulturën e veçantë të tolerancës dhe vëllazërisë që ekziston tek shqiptarët e të gjitha besimeve fetare.
“Kryetari Konjufca theksoi gatishmërinë e Kuvendit të Kosovës për të miratuar plotësimet dhe ndryshimet në Ligjin për Liritë Fetare, të cilat tashmë janë përgatitur, por votimi i tyre është bllokuar nga bojkoti i deputetëve të Listës Serbe në Kuvendin e Kosovës”, thuhet në njoftimin e lëshuar nga Kuvendi i Kosovës.
