Deputetja e Lidhjes Demokratike të Kosovës, Doarsa Kica – Xhelili, ka thënë se Qeveria e Kosovës, po inspirohet nga programi i LDK-së, dhe disa projekte të prezantuara nga ta ka nisur t’i realizojë.
Ajo në një postim në Facebook, ka publikuar dy projekte të propozuara nga LDK më 18 shtator, atë për ndalimin e qeseve të plastikës dhe Kodimin si lëndë obligative në shkolla.
“Po i lë këtu fotot nga shpalosja e programit Rruga e Re më 18 shtator, meqë duket që kemi inspiruar Qeverinë. Kemi edhe 98 tjera të publikuara si këto më poshtë, e dhjetëra të papublikuara. Konventën e kemi me 19 nëntor – për inspirim shtesë”, ka shkruar ajo.
Ministria Mjedisit, Planifikimit Hapësinor dhe Infrastrukturës, ditë më parë kanë marrë vendim që qeset e plastikës në makete të jenë me pagesë, si përpjeke për reduktimin e përdorimit të tyre.
Ndërsa, të hënën kryeministri i Kosovës, Albin Kurti, ka njoftuar për fillimin e javës së kodimit në mbi 250 shkolla vullnetare.
