Kancelari austriak, Karl Nehammer, pasditen e së premtes erdhi në Kosovë, ku u takua me kryeministrin e vendit Albin Kurtin.
Në konferencën e përbashkët për media, kancelari austriak tha se Kosova nuk duhet të ndihet vetëm para asnjë rreziku.
“Ky është një mision i paqes dhe shenjë, sikur është EUROFOR në Bosnjë e Hercegovina. Për ne është e rëndësishme që sikur edhe Bosnja edhe Kosova duhet ta dinë që s’janë vetëm. Pra nëse ka kërcënime, të cilat do t’i shohë dikush, prandaj edhe të reagohet shpejt në lidhje me këto kërcënime. Këtë miqësi dhe këtë lidhje, s’janë vetëm fjalë, por politikë konkrete”, tha Nehammer.
Për çështjen e sigurisë në vend pas luftës në Ukrainë, kryeministri Kurti tha se është brengosëse. Kancelari foli edhe për integrimin e Ballkanit në BE, ku tha se ky proces duhet në mënyrë të përshpejtuar.
Kancelari austriak ndër të tjera tha se Kosova duhet të jetë brenda BE-së.
“Kam folur me kryeministrin për përshpejtimin e procesit të anëtarësimit në BE. Është me rëndësi që Austria të jetë urë lidhëse, por me rëndësi është ta përfshihet edhe Gjermania edhe më tepër, pasi ajo është mike e Kosovës. Për Austrinë Ballkani Perëndimor është pikë gjeostrategjike e rëndësishme dhe kemi lidhje historike me njëri-tjetrin. Me rëndësi është të jemi të lidhur edhe në të ardhmen. Për këtë Kosova nevojitet të jetë brenda BE-së”, tha Nehammer.
I pari i Austrisë, më pas takoi edhe presidenten e vendit, Vjosa Osmanin.
Osmani në një komunikatë për media lëshuar për këtë takim tha se ka kërkuar nga kancelari përkrahje për integrimin e Kosovës në strukturat euroatlantike.
Raporti i gazetarit Valmir Gallopeni.
