Ambasadori amerikan në Kosovë, Jeffrey Hovenier, ka thënë se Shtetet e Bashkuara të Amerikës janë të shqetësuara lidhur me veprimet e fundit të Qeverisë së Kosovës, lidhur me aksionin për mbylljen “institucioneve të administruara nga Serbia” në Dragash, Pejë, Istog e Klinë dhe bastisjen e një OjQ-së serbe në qendër të Prishtinës.
Sipas deklaratës së lëshuar nga ambasada e Kosovës në Prishtinë, këto veprime kanë efekt të drejtpërdrejt dhe negativ në jetën e komuniteteve jo shumicë.
“Qeveria e Shteteve të Bashkuara të Amerikës është thellësisht e shqetësuar për veprimet e fundit të autoriteteve të Qeverisë së Kosovës që kanë ndikim direkt dhe negativ në pjesëtarët e etnisë serbe dhe minoritetet tjera në Kosovë. Këto veprime janë duke rritur në mënyrë të panevojshme tensionet ndëretnike dhe si pasojë kufizojnë opsionet që Shtetet e Bashkuara të shërbejnë si avokuese efektive për Kosovën në arenën ndërkombëtare”, thuhet në deklaratën e Hovenierit.
Poashtu shprehet shqetësimi për sekuestrimin që ka bërë Policia e Kosovës dinarit serb në një veturë “që e transportonte për shpërndarjen e pagesave sociale nga Serbia. Ne kërkojmë nga autoritetet e Kosovës që të sigurojnë që individët për të cilët janë menduar këto pagesa të përfitimeve sociale t’i marrin ato pa vonesë”, thuhet tutje në deklaratë.
ShBA ka bërë thirrje që çështjet që kanë të bëjnë me strukturat e mbështetura nga Serbia duhet të trajtohen përmes dialogut.
“Është përgjegjësi e Qeverisë së Kosovës të promovojë vizionin e përcaktuar në themelimin e saj dhe të sanksionuar në Deklaratën e Pavarësisë dhe Kushtetutën e saj: një nga një demokraci plotësisht multietnike që i përgjigjet shqetësimeve të të gjithë qytetarëve të saj. Çështjet që kanë të bëjnë me strukturat e mbështetura nga Serbia në Kosovë duhet të trajtohen përmes Dialogut të lehtësuar nga BE-ja”, thuhet tutje.
Hovenier ka përsëritur thirrjen që zbatimi rregullores së BQK-së që ndalon qarkullimin e dinarit serb në Kosovës të shtyhet.
Policia e Kosovës me urdhër të Prokurorisë ka mbyllur disa objekte që sipas ministri të Brendshëm, Xhelal Sveçla ishin të strukturave paralele të Serbisë që kanë operuar brenda Republikës së Kosovës.
Aksioni ishte zhvilluar në Pejë, Istog e Klinë.
“Mbesim të përkushtuar në fuqizim institucioneve të Republikës së Kosovës, në respektim të plotë të Kushtetutës sonë dhe unitaritetit të saj. Koha e paligjshmërisë ka përfunduar dhe institucioni i vetëm i Serbisë brenda Republikës së Kosovës do të jetë ambasada e saj në Prishtinë”, kishte shkruar Sveçla për aksionin.
