Kryetari i Aleancës për Ardhmërinë e Kosovës, Ramush Haradinaj, të martën ka vizituar Sindikatën e Pavarur të Minatorëve të Trepçës.
Haradinaj, ka shprehur keqardhje për gjendjen aktuale në të cilën ndodhen minatorët.
Sipas Haradinaj, për mungesën e financave, kushtet e rënda të punës dhe për të ardhurat minimale që nuk paguhen me muaj, më të cilat po përballet “Trepça” fajtore është Qeveria Kurti tash e 4 vjet.
Ai u zotua se Trepçës do t’i kthehet nami dhe shkëlqimi i dikurshëm.
“Sot, Trepça është duke u ballafaquar me probleme serioze që ndërlidhen me mashtrimin që kjo Qeveri po e bën tash e 4 vjet. Ka mungesë të financave, minatorët përballen me kushte të rënda pune, të ardhura tejet minimale që nuk i paguhen me muaj të tërë e pa sigurim shëndetësor. Në vizitën që i bëra sindikatës së minatorëve, shpreha shqetësimin për gjendjen në të cilën gjenden sot minatorët. U zotova para tyre se do t’i jem krah në të gjitha kërkesat, sikur sot por edhe nesër në udhëheqje të vendit. Trepçës duhet t’i kthehet nami dhe shkëlqimi i dikurshëm, kjo përmes projekteve investive – revitalizimit të plotë dhe ofrimit të kushteve më të mira për minatorët”, ka shkruar Haradinaj në Facebook.
