Kryetari i Aleancës për Ardhmërinë e Kosovës, Ramush Haradinaj, ka thënë Qeveria Kurti ka bllokuar punimet në rrugë të reja dhe autostrada.
Ai ka thënë se në tri vitet e para nuk ka filluar e as përfunduar ndërtimi i asnjë rruge të rëndësishme.
“Në tri vitet e para, nuk ka filluar e as nuk ka përfunduar ndërtimi i asnjë rruge të rëndësishme në vend. Projektet e filluara, para vitit 2021, janë ndërprerë, duke shkelur kontratat me operatorët ekonomikë, me çka rreth 60% e të punësuarve në këto ndërmarrje, kanë mbetur pa punë. Janë bllokuar punimet në ndërtimin e kategorisë se rrugëve të reja dhe të autostradave. Sipas publikimeve të ASK, në vitet 2021 dhe 2022 nuk është ndërtuar asnjë kilometër e rrugëve magjistrale dhe vetëm 9 kilometra rrugë rajonale. Sipas të dhënave të Buxhetit për vitin 2024, në periudhën 2021-2023, për ndërtimin e rrugëve të reja nuk është investuar asnjë cent, kurse për autostrada, vetëm 13 milionë euro”, ka shkruar Haradinaj.
Haradinaj ka thënë se mjetet buxhetore të parapara për investime infrastukturore për vitin 2023 nuk janë shfrytëzuar dhe janë bartur në buxhetin e vitit 2024.
Ai ka thënë se me këtë ritëm të zhvillimit Kosova s’mund të arrijë vendet e zhvilluar edhe për njëmijë vjet.
“Të gjitha mjetet buxhetore të parapara për investime në këto kategori të rrugëve për vitin 2023, nuk janë shfrytëzuar por janë bartur në vitin buxhetor 2024, ndërkohë që mjete të reja për këtë vit, janë ndarë vetëm 10 milionë. Sipas kornizës së shpenzimeve të parapara me ligjin e buxhetit, rezulton se të gjitha rrugët e rëndësishme, të filluara para vitit 2021, nuk do të përfundojnë deri në fund të vitit 2026. Me këto dinamika zhvillimore, Kosova edhe njëmijë vjet nuk do t’i mbërrijë vendet e zhvilluara”, ka shkruar Haradinaj
