Personat të cilëve iu bastisën shtëpitë nga Zyra e Prokurorit të Specializuar, nuk kanë status të të dyshuarit.
Të paktën kështu është thënë nga mbrojtësit e ish këshilltarëve të ish presidentit Thaçi.
Bazuar në këtë, njohësit e drejtësisë ngrisin dyshime në lidhje me ligjshmërinë e këtyre bastisjeve dhe mjeteve të konfiskuara si rezultat i këtyre operacioneve.
Sipas avokatit Kadri Osaj, bastisjet janë të justifikueshme juridikisht nëse këta persona po dyshohen për kryerjen e ndonjë vepre penale, në të kundërtën jo.
Në anën tjetër, zgjerimi i bastisjeve edhe tek pronat e prindërve të ish këshilltarëve të ish presidentit, Hashim Thaçi, nga avokatja Fehmije Gashi Bytyqi, vlerësohet si e pakuptimtë.
Aktualisht nga organet e Speciales përpos konfirmimit të kryerjes së këtyre bastisjeve, nuk janë dhënë arsyetime tjera.
