Deputetja e Aleancës për Ardhmërinë e Kosovës, Albana Bytyqi, tha se çështja e dinarit do të zgjidhej shumë më lehtë, në qoftë se Qeveria Kurti do të bashkëpunonte fillimisht me Shtetet e Bashkuara të Amerikës.
Sa i përket takimit të sotëm në Bruksel mes ekspertëve financiarë të Kosovës dhe Serbisë, nën ndërmjetësimin e emisarit evropian për dialogun, Miroslav Lajçak, lidhur me përdorimin e dinarit serb në Kosovë, Bytyqi vlerësoi se qasja e kryeministrit Kurti ndaj aleatëve të vendit, s’është aspak serioze.
“S’po shoh ndonjë përmirësim në këtë rast. Gjendja me aleatët duhet të përmirësohet, duhet të ketë seriozitet më të madh. Ajo çka po kërkon Kurti dhe mënyra se si po u qaset aleatëve tanë, s’është aspak serioze. Ne si parti opozitare e kemi përkrahur këtë vendim, i kemi dhënë mbështetje Qeverisë Kurti. Mirëpo, duhet dakordim të mos ketë acarim të situatave, të mos rëndohet më shumë situata. Çështja e dinarit do të zgjidhej shumë më lehtë në bashkëpunim me ShBA-të, është një çështje që po diskutohet në Bruksel, e që s’ka qenë nevoja aspak, mirëpo po shihet që Kurti dhe Bislimi nuk po merren vesh mes vete, prandaj kjo çështje diku duhet të diskutohet”, deklaroi Bytyqi në emisionin “Ditari”.
Ndërkaq, e pyetur se a i duhet Kurtit një vizitë në ShBA, deputetja tha se kryeministri s’mund te ketë ftesë për takime atje, përderisa nuk bashkëpunon me ta.
“Është e nevojshme vizita e Kurtit në ShBA, mirëpo përderisa nuk po i mbështet, e nuk po ka bashkëpunim me ta, normalisht që s’mund të ketë as ftesë për takime nga aleatët”, potencoi tutje Bytyqi në Tëvë1.
Sot në Bruksel është mbajtur takimi trepalësh lidhur me përdorimin e dinarit serb në Kosovë. Mirëpo, rezultatet nga ky takim nuk janë ende të qarta.
Pas takimit, Banka Qendrore e Kosovës ka njoftuar se përfaqësuesit e Bashkimit Evropian nuk e kanë vënë në dyshim mandatin e BQK-së për rregullimin e çështjes së dinarit, por se brengat e tyre kanë të bëjnë me ndikimin që mund të ketë te komuniteti serb në Kosovë.
Ndërsa, Emisari i BE-së për dialogun Kosovë-Serbi, Miroslav Lajçak, ka potencuar se takimi ishte një hap i parë rëndësishëm, por që shumë pyetje politike kanë mbetur pa përgjigje./teve1.info/.
