Banka Qendrore e Kosovës (BQK) ka njoftuar se faza e tranzicionit të zbatimit të rregullores së saj, e cila e ndalon përdorimin e dinarit serb, nuk mund të zgjasë më shumë se tre muaj.
Në një njoftim të publikuar të hënën BQK ka prezantuar Planin e veprimit shtesë.
“Ky plan kontribuon veçanërisht tek qytetarët me qasje të kufizuar në financa dhe shërbime financiare dhe mundëson rritjen e qasjes në financa të sigurta përmes bankave dhe institucioneve financiare jobankare, gjithpërfshirjen financiare dhe mbrojtjen e tyre nga aktivitetet financiare të pashëndosha, si angazhime të vazhdueshme të BQK-së mbi bazën e praktikave më të mira evropiane”, thuhet tutje.
Kryeministri i Kosovës, Albin Kurti në një intervistë për mediumin britanik Bloomberg TV, ka thënë se s’do të ketë tërheqje nga vendimi i BQK-së, duke shtuar se nuk do të ketë ndëshkime në këtë fazë.
BE e ShBA kanë kërkuar që zbatimi i rregullores së re të BQK-së të shtyhet./teve1.info/
