Deputetja e LDK-së, Hykmete Bajrami, deklaroi se më 30 dhjetor të vitit 2022, me urdhër të një gjykate e cila nuk është kompetente, janë ekzekutuar 3.5 milionë euro nga xhirollogaria e fondeve të AKP-së, e që të cilat qëndrojnë në Bankën Qendrore të Kosovës.
Gjatë seancës plenare në Kuvend, Bajrami tha se ministrja e Drejtësisë, Albulena Haxhiu, ka suspenduar një përmbarues privat me kërkesë të AKP-së lidhur me këtë rast, raporton teve1.info.
“Unë sot do të flas për një skandal tjetër, për skandalin 3.5 milionë në Agjencinë Kosovare të Privatizimit. I nderuar kryeministër Kurti, ajo çfarë dimë ne deri me tani me rastin, është që me datën 30 dhjetor të vitit 2022 brenda tri orëve, me urdhër të një gjykate e cila nuk është kompetente, janë ekzekutuar 3.5 milionë euro nga xhirollogaria e mirëbesimit, fonde të AKP-së të cilat qëndrojnë në Bankën Qendrore të Kosovës. Ne e dimë të gjithë që për çështjet e privatizimit ekskluzivisht kompetente është vetëm dhoma e posaçme në kuadër të Gjykatës Supreme. Andaj, këto 3.5 milionë euro janë ekzekutuar me urdhër të Gjykatave tjera dhe krejt çka kemi pa është që Ministrja e Drejtësisë, Albulena Haxhiu e ka suspenduar një përmbarues privat me kërkesë të AKP-së për këtë rast”, deklaroi Bajrami para deputetëve.
Madje, Bajrami tha se sipas informatave që posedojnë, AKP=ja veçse ka reaguar dhe Prokuroria ka arritur t’i bllokojë 2.1 milionë euro.
“Mirëpo, fondet e AKP-së të cilat janë disbursuar tanimë në xhirollogari të Gjykatësve dhe Prokurorëve janë 1.4 milionë euro”, tha tutje Bajrami.
Prandaj, lidhur me këtë çështje, Bajrami kërkoi nga Kryetari i Kuvendit, Glauk Konjufca dhe nga komisionet funksionale, që sa më shpejt të marrin informata lidhur me rastin./teve1.info/.
