Bardh Ahmetaj nga Partia Socialdemokrate, është deklaruar rreth anëtarësimit të Kosovës në Këshillin e Evropës dhe presionit të ndërkombëtarëve për Asociacionin.
I ftuar në Tëvë1, Ahmetaj bëri thirrje për mobilizim nga qytetarët që të kundërshtojnë bindshëm dërgimin e draft-statutit të Asociacionit në Gjykatën Kushtetuese, nga kryeministri i vendit, Albin Kurit.
“Bëj thirrje për mobilizim tepër të madh, që qysh në momentin kur Kurti e dërgon draftin e Asociacionit në Gjykatën Kushtetuese, të ketë mobilizim, sepse presioni në Gjykatën Kushtetuese, qoftë nga bashkësia ndërkombëtare, qoftë nga individë të ndryshëm, është tepër i madh. Pra, bëj thirrje që të ketë mobilizim të madh për kundërshtim, sepse ky kryeministër ndalet vetëm nga kundërshtimi i madh i qytetarëve”, deklaroi Ahmetaj në emisionin “Ditari”.
Madje, Ahmetaj tha se Kosova e ka “ulë pazarin tepër shumë”, duke thënë se pozicioni i saj s’ka qenë kurrë më i dobët.
Njëkohësisht, ai vlerësoi se Kurti daljen e vetme aktualisht e ka dorëheqjen nga pozita e kryeministrit.
“Kosova e ka ulë pazarin tepër shumë. Ajo çka po flitet është që Kosova po e bën një kompromis tepër të madh, për të marrë diçka shumë të vogël. Serbia s’është duke bërë as kompromise të mëdha dhe në fund po e merr integrimin në Bashkimin Evropian, Kosova nuk po fiton asgjë. Pozicioni i Kosovës s’ka qenë kurrë më i dobët. Kurti sot është në një dispozicion ku daljen e vetme e ka dorëheqjen”, potencoi tutje Ahmetaj./teve1.info/.
