Numri i mësimdhënësve në komunën e Pejës pritet të reduktohet.
Kjo për shkak së në këtë qytet, punojnë 194 punonjës arsimor më shumë se sa ka nevojë.
Kësisoj, Drejtoria e Arsimit në këtë komunë ka marrë vendim që t’ua shkëpus kontratën këtyre mësimdhënësve.
E largimi i tyre pritet të bëhet në bazë të disa kritereve.
“Me regjistrimin e popullatës në Komunën e Pejës, me numrin e nxënësve që kemi në shkollë, Ministria e Financave dhe Arsimit e parasheh këtë reduktim dhe mbi bazën e tyre ne do të veprojmë. Të parët që do të largohen janë ata të cilët nuk janë të kualifikuar, pastaj vijnë ata të cilët kanë performancë të ulët të mësimdhënies, në tre vie stazhi dhe çështje të tjera”, deklaroi ish-drejtori i Arsimit, Naser Gega.
Nga largimi nuk do të kursehen as mësimdhënësit të cilët kanë kontratë të përhershme.
Por si do të bëhet matja e performancës?
“Performanca pa hyrë në detaje profesionale është një perfomancë të cilën e kanë ndërtuar ata vet, shihen mungesat të cilat ata i kanë bërë gjatë vitit shkollor, disa mësimdhënës kanë tendenca të mungesave të dukshme, vonesat në orë të mësimit, notimet, ku ka notime lineare, për shembull brenda ditës krejt klasa merr nota të dobëta kjo është perfomanca e jashtme pa hyrë edhe në pjesën profesionale të tyre”, tregoi Gega.
Sipas ish Drejtorit të Arsimit, kjo ka shkaktuar “tërmet” te mësimdhënësit në komunën e Pejës.
Mirëpo siç thotë ai, kjo do i vetëdijësojë ata që bëjnë një punë më cilësore.
E nga Sindikata e Bashkuar e Arsimit, këtë lajm e kanë parë me shqetësim.
“Nuk është hap i qëlluar dhe nuk duhet të bëhet, duhet të gjenden mundësitë se çfarë me teprica teknologjike, të respektohet ligji dhe nuk është e lehtë t’i thuhet dikujt që të shkohet në shtëpi, ngase as teste nuk janë ato që janë krejt rregull”, deklaroi Rrahman Jashari.
Edhe sipas njohësit të arsimit, Rinor Qehaja, vendimi i komunës së Pejës është i ndjeshëm.
Por sipas tij, jo vetëm në këtë qytet por në tërë Kosovën ka numër më të madh të mësimdhënësve të punësuar se sa numri i nxënësve që është.
“Këto janë vendim të cilat prekin jo vetëm një komunë, por ky numër i tepërt është në proporcion me rënien demografike te numrit të nxënësve por në të njëjtën kohë është paradoksale që përtej këtij trendi të uljes së nxënësve prapë ti e sheh një trend në rritje të rekrutimit të mësimdhënësve , kjo mospërputhje në alokimet buxhetore, për rrjedhojë alokimet buxhetore për rekrutim e mësimdhënësve kërkon llogaridhënie”.
Ky vendim pritet të hyjë në fuqi gradualisht gjatë vitit 2026.
