Gjykata Themelore ne Ferizaj për Tëvë1 ka konfirmuar se 18 vjeçari i dyshuar për vrasjen e rreshterit policor, Muhamed Lika në Kaçanik ka qenë i dënuar për veprën penale “Dhunim”.
Në përgjigje thuhet se i dyshuari i cili ka qenë i mitur në kohën e kryerjes së veprës penale, është në procedurë të ekzekutimit të masës institucionale për dy vjet për dhunim.
“Referuar pyetjes suaj, ju njoftojmë se i dyshuari i mitur për rastin në fjalë të veprës penale “Vrasja e rëndë” për të cilën gjykata ka lëshuar Komunikat për Media dhe ju ka njoftuar se gjyqtari i çështjes ka caktuar masën e paraburgimit në kohëzgjatje prej një (1) muaj, ka në procedurë të ekzekutimit të masës institucionale në kohëzgjatje prej dy (2) vite për veprën penale dhunimi nga neni 227 paragrafi 6 lidhur me paragrafin 1 të KPRK-së për të cilën ka të lëshuar urdhërrarrest”, thuhet në përgjigje.
Ndryshe, 18 vjeçari është njëri nga shtatë të arrestuarit nga Policia e Kosovës gjatë një aksioni të gjerë policor mëngjesin e së hënës si të dyshuar për “planifikimin dhe kryerjen e vrasjes” e rreshterit Muhamed Lika, më 1 prill në Kaçanik.
Ndaj tij Gjykata Themelore në Ferizaj të hënën ka caktuar masën e paraburgimit në afat prej 30 ditësh.
Caktohet 1 muaj paraburgim për të miturin e dyshuar për vrasjen e rreshterit Lika
