Që prej dy javës një restauruan në Podujevë qëndron i mbyllur.
Kjo meqë po dyshohet se u helmuan disa persona.
Një numër i tyre, kërkoi edhe ndihmë mjekësore.
Epidemilogia në QKMF-në e Podujevës, Bedrie Rama, tregon se të gjithë pacientët ishin punëtorë të një kompanie.
“Jemi interesuar se çfarë ushqimi kanë përdor a kanë përdor ushqim të njëjtë dhe e kanë dhënë emrin e një restaurant të gjithë këta pacient që janë lajmëruar kane qenë punëtorë të një firme. Në përgjithësi sa janë lajmëruar sa i përket shenjave të helmimit kanë qenë 15 raste e pacient. Me datën 20 këta pacient janë pranuar në Klinikën Infektive se domethënë hyjnë në këtë grup të pacienteve që kanë qenë të dyshimit në helmim”, tha Rama.
Por këto dyshime për helmim po i kundërshton pronarja e biznesit në fjalë.
Sipas saj, nga mostrat të cilat i ka marrë tek Instituti Kombëtar i Shëndetit Publik, nuk ka dalë asnjë baktere.
“Kur klientët i kanë ngritur dyshimet për helmim ne e kemi telefonua Inspektoratin Sanitar e bashkë më koleget nga IKSHPK-ja kanë ardh me datën 19 i kanë marr mostrat e ushqimeve në lokal dhe e kanë mbyllur përkohësisht lokalin. Raporti i testimit ka ardhur dje dhe ka dal që në asnjë mostër që është marr në mostrat e ushqimeve të ujit në duart apo rrobat e punëtorëve nuk ka dal asnjë bakter që mundesh me shkaktuar helmimin në këtë rast të gjitha mostrat kanë dalë negative”, tha pronarja e biznesit, Fikrete Rudari-Musliu.
Në dokumentet që pronarja ia tregoi televizionit, shihet se inspektorët kanë marrë si mostër dy lloje të ushqimeve, piret e gatshme dhe sallatën e lakrës.
Rudari Musliu hedh akuza se dikush deshi t’ia dëmtojë qëllimisht biznesin që sapo e kanë hapur.
“Ajo se çfarë kanë treguar pacientet është se në momentin që kanë shkuar me u trajtuar doktorët dhe infermieret aty i kanë pyetur direkt se a kanë ngrënë bukë tek restaurant për arsye se ka gjasa qe jeni helmuar aty. Unë nuk e shoh të arsyeshme nga ana e personelit shëndetësorë me përhap panik te njerëzit pa pasur fakte se a janë helmuar apo jo e që ka qenë vetëm dyshime për helmim, dhe e dyta me potencuar direkt me gisht kah na”, tha pronarja e biznesit.
Pronarët e biznesit thonë se do të ndjekin edhe rrugët ligjore për ta zbardhur këtë rast.
Mirëpo, këto akuza i ka hedhur poshtë epidemiologia Rama, duke thënë se akoma nuk e kanë pranuar raportin zyrtar të IKSHPK-së për këtë rast.
