Ish-guvernatori i Bankës Qendrore të Kosovës, Fehmi Mehmeti ka përmbledhur sukseset e BQK-së gjatë mandatit të tij 5-vjeçar të cilin e përfundoi dje.
Mehmeti e ka cilësuar një periudhë sfiduese dhe me të arritura edhe pse sipas tij, gjatë mandatit janë ballafaquar me pandeminë COVID-19 dhe si dhe me efektet e agresionit rus ndaj Ukrainës.
“Kemi arritur që të kemi një institucion me qëndrueshmëri financiare, që tashmë të dhënat e fundit të paauditiuara diku rezultati pozitiv i Bankës është rreth 8 milionë euro. Në anën tjetër sektori financiar, po flasim për një sistem financiar likuid dhe mirë i kapitalizuar. Nëse nisemi prej licencimit BQK, licencon, rregullon dhe mbikëqyr të gjitha institucionet në vend.”
“Qëllimi i jonë ka qenë që të licencohen institucionet financiare të cilat i kontribuojnë stabilitetit financiar në vend dhe zhvillimit ekonomik në vend. Në këtë rast nëse e marrim sektorin bankar, gjatë kësaj periudhe në të gjithë indikatorët ka pasur ngritje, po flasim për vitin 2018 dhe deri në fund të vitit 2022. Vlera e aseteve në sistemin financiar në vend është rritur rreth 61%, nëse i shohim kredit janë rritur 57.5%, nëse i shohim depozitat janë rritur rreth 60%”, ka thënë Mehemti në emisionin “Ditari” në Tëvë1.
Mehmeti ka bërë të ditur se bankat në Kosovë kanë kapital të mjaftueshëm në dispozicion për të mbështetur ekonominë e vendit.
“Nëse e shohim anën tjetër të kredisë përformuese kanë shënuar rënie, norma e kredisë përformuese me të dhënat e fundit që i kemi pasur në dispozicion kanë qenë rreth 2% të cilat kanë qenë mirë të provizionuara rreth 150%, raporti i likuiditetit vazhdon të jetë i lartë 36.5% që është lartë mbi minimumin e kërkuar rregullativ që kërkohet të jetë 25%, kjo tregon që bankat kanë kapital të mjaftueshëm në dispozicion për ta mbështetur ekonominë e vendit dhe gjithashtu raporti i mjaftueshmërisë kapitale shënon 14.8% që lartë mbi minimumin e kërkuar rregullativ që kërkohet të jetë 12%”, shtoi ai.
Fehmi Mehmeti, është larguar dje nga pozita e guvernatorit, ndërsa nga dita e sotme Bordi i Bankës Qendrore të Kosovës në një vendim të saj ka vendosur që mandatin ta ushtrojë si ushtrues detyre, Bashkim Ruboja i cili është kryesues i Bordit të BQK-së.
