Ministri i Punëve të Brendshme, Xhelal Sveçla, tha se me urdhër të prokurorit janë mbyllur gjashtë njësi të së ashtuquajturës Banka Postare e Kursimeve në veri të Kosovës, raporton teve1.info
Përmes një shkrimi në Facebook, Sveçla tha se një aksion i tillë është bërë me qëllim të vendosjes së ligjshmërisë dhe në bashkëpunim me Administratën Tatimore të Kosovës.
“Me qëllim të vendosjes së ligjshmërisë, pas komunikimit dhe kërkesës së institucioneve relevante dhe autorizimit të prokurorit, Policia e Kosovës në bashkëpunim me Administratën Tatimore të Kosovës, në katër komunat në veri të Kosovës ka realizuar sot operacionin e kontrollit dhe mbylljes së 6 njësive të të ashtuquajturës Bankë Postare e Kursimeve (Banka Postanske Stedionica) si institucion i jashtëligjshëm financiar i Serbisë në Republikën e Kosovës.
Sundimi i rendit dhe ligjit, shërbimi ndaj të gjithë qytetarëve pa asnjë dallim do të vazhdojë të jetë qëllimi ynë për të cilin jemi zotuar në vazhdimësi.
Përgëzoj të gjitha institucionet për bashkëpunimin dhe suksesin e treguar”, ka shkruar Sveçla.
