Një qytetar me inicialet J.M. në Mitrovicë është arrestuar pasi dyshohet se ka mashtruar për dy vite radhazi persona të ndryshëm duke përfituar rreth 2 milionë euro, raporton teve1.info
Sipas komunikatës së Prokurorisë në Mitrovicë, i dyshuari ngarkohet me veprën penale “Mashtrimi” nga Kodi Penal i Republikës së Kosovës dhe është ndaluar për 48 orë.
“Prokuroria Themelore në Mitrovicë, njofton opinionin se është arrestuar personi i dyshuar me iniciale J.M,. me dyshimin se në periudha të ndryshme nga viti 2021 e gjer në muajin korrik 2023, në mënyrë mashtruese ka mashtruar qytetarë të ndryshëm, me qëllim të përfitimit të dobisë pasurore për vete, dhe dyshohet se vlera e përfitimit është rreth 2 milionë euro. Me këto veprime i dyshuari ka kryer veprën penale “Mashtrimi” nga neni 323 i Kodit Penal të Republikës së Kosovës. I dyshuari, me vendim të prokurorit gjendet në ndalim 48 orësh, dhe në afatin e paraparë ligjor Prokuroria Themelore në Mitrovicë ndaj të dyshuarit do të paraqes kërkesë për caktimin e masës së sigurisë – masës së paraburgimit”, thuhet në komunikatë.