Kryetari i partisë Nisma Socialdemorkate, Fatmir Limaj, ka marrë mbështetje nga ish kryetari i Komunës së Malishevës, Isni Kilaj për zgjedhjet e ardhshme që pritet të mbahen në Kosovë.
Përmes një statusi në Facebook të kësaj partie, është bërë e ditur se Limajn do ta mbështesin në zgjedhjet e ardhshme, kryetari Kilaj me familjarët e tij.
Limaj ka thënë se e falënderon familjen Kilaj për këtë mbështetje.
““Falënderim e mirënjohje të thellë për mbështetjen që na dha sot familja e bashkëluftëtarit tim, z. Isni Kilaj”
Idenë e projektit të përbashkët e kemi nisur me Isniun, por fatkeqësisht për shkak të rrethanave që tani janë të njohura, z. Kilaj nuk është sot këtu me ne, por ne besojmë dhe presim që sa më parë t’i kthehet familjes e Kosovës. Bashkë me familjarët e z. Kilaj ne sot e konkretizuam idenë që bashkë e nisëm.
Çdo herë kur jemi bashkuar vetëm të mira i kemi sjellë Malishevës e Kosovës, prandaj, ky bashkim le të paraprijë për bashkime të tjera, të të gjithë atyre që i përkasin këtyre vlerave.
Mbështetja e familjes së nderuar të bashkëluftëtarit Kilaj është vlerë e shtuar për ne dhe shpresojmë e besojmë fuqishëm që Isni Kilaj me shokë, që padrejtësisht po mbahen në Hagë, do të kthehen sa më parë në vendlindje”, thuhet në njoftimin e Nismës.
