Asamblisti i Vetëvendosjes në Prishtinë, Arianit Beqiri, tha se kjo parti e ka thirr një seancë të jashtëzakonshme këtë javë në Prishtinë, në mënyrë që të zgjedhet kryesuesi i Kuvendit Komunal, raporton teve1.info
Pas shakrimit të kryesuesit nga radhët e LDK-së, Pëllumb Bajqinovci, Beqiri tha se si partia më e madhe në asamblenë e kryeqytetit, ka ndjerë nevojën që ta zhbllokoj procesin dhe të thërrasë seancë të jashtëzakonshme, mirëpo shtoi se nuk ka propozim për emrin e kryesuesit.
Në emisionin “Ditari” në Tëvë1, Beqiri tha se nuk do ta propozojnë asnjë emër për kryesues të Kuvendit Komunal pasi sipas tij, nuk dëshirojnë të hyjnë në koalicion dhe të kërkojnë vota nga LDK e PDK.
“Ne nuk dëshirojmë të bllokojmë Kuvendin Komunal, andaj ne si grupi më i madh kemi thënë që po hapim rrugë dhe nuk dëshirojmë të zgjedhim personin por vetëm të hapim rrugë dhe të zgjidhim problemin në Kuvendin Komunal të Prishtinës, ne jemi të gatshëm të ulemi e të diskutojmë. Ne nuk kemi emër, nuk propozojmë ndonjë emër tonin, për të vetmen arsye se nëse propozohet ne duhet të kërkojmë vota edhe nga LDK e PDK ne nuk jemi të interesuar për këtë pozitë e as të kërkojmë vota nga këto parti”, tha ai.
Beqiri tha se deri tek kjo nismë e thirrjes së seancës së jashtëzakonshme për zgjedhjen e një kryesuesi të ri dhe shkarkimin e kryesuesit të kaluar, ka ardhur pasi tash e tre muaj në Kuvendin Komunal të Prishtinës nuk është mbajtur asnjë seancë e rregullt.
“3 muaj pa seancë të rregullt në Kuvendin Komunal në Prishtinë , andaj morëm vendim që grupi jonë të inicioj shkarkimin e kryesuesit të Kuvendit, i cili është njëri prej përgjegjësve kryesor për dhe pas kësaj, dy javë pas ne pritëm që të ketë ndonjë hap përpara që ose të propozoj një emër të ri ose kontaktoj qoftë me opozitën të bëhet një zgjedhje, një gjë e tillë nuk ka ndodhur dhe sot kemi thirrur seancë të jashtëzakonshme për zgjedhjen e kryetarit të ri”, tha Beqiri.
Ai shtoi e këtë seancë e ka thirr VV vetëm pasi ka 17 vota,aq sa nevojiten për seancë të jashtëzakonshme. Por ai, shtoi se për t’u zgjedhur dikush kryesues duhet të jenë 26 asamblistë prezent, pasi nevojitet kuorumi parlamentar.
