Shtatë ushtarë turq kanë humbur jetën si pasojë e helmimit me gaz metani gjatë një operacioni kërkimi në një shpellë në veri të Irakut, njoftoi të hënën Ministria e Mbrojtjes e Turqisë.
Ky incident tragjik e çon në 12 numrin total të ushtarëve të vdekur. Trupat ishin angazhuar në kërkimin e eshtrave të një ushtari të vrarë më parë nga militantët kurdë.
Sipas njoftimit zyrtar, ngjarja ndodhi ndërsa 19 ushtarë eksploronin një shpellë malore dhe u ekspozuan ndaj gazit metani – një gaz pa ngjyrë, pa erë dhe i rrezikshëm në përqendrime të larta, pasi mund të shkaktojë asfiksi. Pesë prej tyre ndërruan jetë të dielën, ndërsa shtatë të tjerë vdiqën të hënën.
“I lutemi Zotit për mëshirë për martirët tanë dhe shpresojmë për një shërim të shpejtë të të plagosurve,” thuhej në deklaratën e ministrisë.
Më tej u bë e ditur se ministri i Mbrojtjes, Yasar Guler, së bashku me komandantë të lartë të ushtrisë, po udhëtojnë drejt rajonit për të kryer inspektime, vlerësime dhe për të marrë pjesë në ceremonitë mortore.
Incidenti ndodhi në zonën e njohur si “Operacioni Claw-Lock”, një fushatë ushtarake që ka nisur në prill të vitit 2022 kundër Partisë së Punëtorëve të Kurdistanit (PKK), ka raportuar AP.
Ende nuk ka informacion të detajuar për gjendjen shëndetësore të shtatë ushtarëve të tjerë që u ekspozuan ndaj gazit.
PKK-ja, e cila konsiderohet organizatë terroriste nga Turqia dhe shumë vende perëndimore, në maj kishte njoftuar për shpërbërjen e saj dhe për një iniciativë të re paqeje me Turqinë, që përfshin edhe dorëzimin e armëve në ditët në vijim.
Ministria e Mbrojtjes sqaroi se ushtarët turq që u prekën nga gazi ishin pjesë e një njësie që po kërkonte për eshtrat e një oficeri të vrarë në një mision në maj të vitit 2022. Zona në fjalë është eksploruar nga ekipet e shpëtimit për gati tre vjet.
Shpella ku ndodhi tragjedia ndodhet në një lartësi prej 852 metrash dhe kishte shërbyer më parë si një spital fushor i përdorur nga PKK-ja.
