Gazetari nga Shqipëria, Aleksandër Çipa ka folur për zgjedhjet lokale që pritet të mbahen të dielën atje. Ai thotë se fushata e kandidatëve nuk ka qenë e konkurrimit dhe ballafaqimit të programeve.
“Fushata nuk ka qenë e konkurrimit dhe e ballafaqimit të programeve, projekteve dhe individëve konkurrues, por ka qenë fushatë e mbajtur në një dimension politikbërës prej aktorëve më të rëndësishëm të skenës politike të Shqipërisë së sotme”, tha gazetari Çipa në emisionin “Ditari” në Tëvë1.
Sipas tij, fushata është përdorur prej aktorëve kryesorë me ç’rast është dëmtuar “substanca” e procesit zgjedhor.
“Fushata është përdorur prej aktorëve kryesorë për një politikëbërje konkurrente, nuk u përdor si një fushatë që të kishte evidentuesit e vetë, propozimet, profilet, projektet dhe platformat. Në këtë vështrim u dëmtua ajo ‘substanca’ e procesit zgjedhor, sepse ne sot e kemi të vështirë se në cilat qytete kryesore kandidatët ofruan projekte më inovatore”, tha ai.
Ndërsa, për Partinë Demokratike, Çipa tha se mbetet në fatin e vetë të papërcaktuar.
“Partia Demokratike mbetet në fatin e vetë të papërcaktuar, dhe si i tillë ky fat do të jetë edhe më specifik në periudhën e paszgjedhjeve të 14 majit. Ato tashmë që mund t’i konsiderojmë të kryera është fakt që ndarja brenda Partisë Demokratike ka ndodhur, është një ndarje e pariparueshme dhe sipas të gjitha premisave e pakthyeshme. Në këto vështrime, duket se ne në ditën e ardhshme ne do të kemi një formalizim të një spektri opozitar që përfaqësohet nga protagonistë të ndryshëm dhe nga aktorë opozitar, por që janë oponent mes vete”, shtoi ai.
Të dielën, më 14 maj, në Shqipëri votohet për 61 bashki, zgjedhje këto që mbahen çdo katër vjet. Në këtë garë janë 7 subjekte politike, ku në mesin e tyre është një koalicion. /teve1.info/
