Zëvendëskryeredaktori në televizionin Tëvë1, Agron Halitaj ka folur për ditën e shpalljes së Pavarësisë së Kosovës në kohën sa ishte gazetar. Ai tha se kur të gjithë festuan, gazetarët punuan.
Sipas Halitajt, gazetari është i privuar nga kënaqësitë që të tjerët i shijojnë, pasi duhet të raportojnë.
“Para 15 vitesh në ditën kur kemi raportuar për aktin historik shpalljen e Pavarësisë së Kosovës, kur të gjithë kanë festuar, ne kemi qenë duke punuar. Kjo është ajo që e përcjell gazetari, ndonjëherë është i privuar nga këto kënaqësitë që tjerët i shijojnë ne duhet të raportojmë, me qenë në shërbim të publikut”, ka thënë ai në emisionin “1 Natë” në Tëvë1.
Halitaj po ashtu ka thënë se atë kohë dihej se 17 shkurti ishte dita kur do të shpallej pavarësia, por se nuk u bë publike deri në momentet e fundit.
“Tash e 15 vite kam qenë pjesë e Kohës Ditore si gazetar politik, i kam përcjellur zhvillimet gjatë gjithë kohës. Në fakt të gjithë e dinim se 17 shkurti ishte dita kur do të shpallej pavarësia, mirëpo deri në momentet e fundit deri në atë ditë nuk bëhej publike data. Zyrtarisht ka filluar tek në orën 12:00 kur në atë kohë ish-kryeministri Hashim Thaçi dhe ish-presidenti Fatmir Sejdiu, i drejtohen Kryesisë së Kuvendit për seancë të jashtëzakonshme. Aty bëhet publike se në orën 15:00 të mblidhet Kuvendi për të shpall Pavarësinë e Kosovës”, theksoi Halitaj.
Më tej, Halitaj tha se gazetarët e gazetave të asaj kohe ishin të privuar nga prania në seancën kur u shpall pavarësia, pasi nuk kishte hapësirë.
“Unë si gazetar i Kohës Ditore, i gazetës, jo vetëm unë por edhe gjithë gazetarët që kanë qenë të gazetave, kemi qenë të privuar atë ditë nga prania në seancë, për shkak të hapësirës së ngusht që e kishte Kuvendi, pasi atë ditë e kishin vërshuar mediat e huaja, plus radiot e televizionet që i kishte Kosova, ishin mbi 200 me gjasë që ishin media të huaja. Nuk kishte hapësirë. Ne gazetarët e gazetave ishim jashtë objektit”, përfundoi ai. /Teve1.info/
