Politologu, Dritëro Arifi, vlerësoi që Qeveria Kurti ka injoruar qëllimisht që 12 muaj veteranët e Ushtrisë Çlirimtare të Kosovës.
Madje sipas tij, audio-incizimet e publikuara ndërmjet shefes së Grupit Parlamentar të Lëvizjes Vetëvendosje, Mimoza Kusari-Lilës dhe ish-deputeti i Listës Serbe, Slavko Simiq, veçse e ka përkeqësuar situatën më shumë.
“Ish-ushtarët e UÇK-së që 12 muaj nuk kanë pasur takim me Qeverinë e Kosovës. Kjo tregon që qeveria qëllimisht i ka injoruar gjithë këta muaj. Pra, ky është injorim total i komplet vlerave të luftës. Incizimet na treguan se kjo është e qëllimshme. Qeveritë nuk janë për t’u ankuar, janë për të zgjidhur situata, në momentin që ankohen, atëherë nuk e meritojnë të jenë aty. Qeveria aktuale që 2 vite e gjysmë ka pasur vetëm ankesa. Pra, dokumenti zyrtar i Qeverisë e ka miratuar një ligj për pagë minimale me injorim total të vlerave të luftës. Incizimi që doli me aferën “Zdravo”, i ka hedhur benzinë zjarrit”, deklaroi Arifi në emisionin “Këndi i Debatit”.
Kujtojmë që kryetari i Shoqatës së Familjeve të Dëshmorëve, Xhavit Jashari pas takimit me presidenten e vendit, Vjosa Osmani ka bërë të ditur se veteranët e Ushtrisë Çlirimtare të Kosovës do të mbajnë protestë dhe do të bllokojnë punën e Parlamentit të Republikës së Kosovës.
Kjo sepse sipas Jasharit, Qeveria Kurti ka diskriminuar kategorinë e veteranëve të luftës me Ligjin mbi Pagën Minimale./teve1.info/.
