Deputeti i LDK-së, Besian Mustafa ka reaguar pas raportimeve se në Shqipëri është kapur me drogë asamblisti i VV-së në Prishtinë, Besnik Mujeci.
Përmes një statusi në Facebook, Mustafa ka thënë se Mujeci ishte emëruar nga partia e tij aksionar në Stacionin e Autobusëve në Prishtinë dhe i përdorte ata autobusë për trafikim të narkotikëve drejt Tiranës.
“Prishtina dhe Tirana në qiell ishin të ndara, por në tokë u bashkuan nga narkotrafikantët e VV-së”, ka shkruar ndër të tjera Mustafa.
“Asamblisti i VV-së në Prishtinë, i emëruar nga partia e tij aksionar në Stacionin e Autobusëve, përdorte këta autobusë për të trafikuar narkotikë drejt Tiranës, ku dhe u arrestua i zënë me 10.000 doza droge! 10.000!!! Qysh e kishte emëru’ tipi drogën? LV. #ErlliDita #LVV”, shkruan ai.
Asamblisti i LVV-së, Besnik Mujeci së bashku me katër persona të tjerë u kap në Shqipëri pasi i kishin kaluar nga Kosova në Tiranë, 11 mijë e 300 doza substancë narkotike të llojit Ekstazi.
Policia dha një deklaratë zyrtare për sasinë e sekuestruar të Ekstazisë të hënën në mbrëmje në Tiranë.
Sipas policisë bëhet fjalë për 11 mijë e 300 kokrra Ekstazi me peshë 5 kg e 93 gr dhe me vlerë tregu 400 mijë euro.
