Prokuroria Speciale e Kosovës ka ngritur aktakuzë në mungesë ndaj të pandehurit me inicialet Ç.A. për krime të luftës të kryera gjatë periudhës janar-maj të vitit 1999, raporton teve1.info
Sipas komunikatës së Prokurorisë, kjo e fundit ka propozuar që edhe gjykimi të mbahet në mungesë pasi që janë shterur të gjitha përpjekjet për ta gjetur të akuzuarin.
Aktakuza është ngritur në Gjykatën Themelore në Prishtinë – Departamentin Special.
“Prokuroria Speciale njofton se i akuzuar Ç.A. në periudhën kohore janar – maj 1999, duke bashkëvepruar me një grup njerëzish kriminal (tani për tani të pa identifikuar), të organizuar, të veshur me uniforma policore, paramilitare, ushtarake, ka kryer veprën penale ‘’Krimi i luftës kundër popullsisë civile’’, e ndëshkuar me nenin 142 të Ligjit Penal të ish Republikës Socialiste Federative të Jugosllavisë ( tutje ‘’RSFJ’’) si ligj në fuqi në kohën e kryerjes së veprës penale, aktualisht i ndëshkueshëm sipas veprës penale Krime lufte në shkelje të rëndë të nenit 3 të përbashkët për konventat e Gjenevës, dhe nenin 4 të Protokollit 2 të datës 08.06.1977, aktualisht e ndëshkueshme me neni 146 dhe 147 të Kodit Nr. 06/L-074 Penal të Republikës së Kosovës ( tutje ‘’KPRK’’)”, thuhet ndër të tjera në komunikatën e Prokurorisë Speciale.
