Ekipi i Tëvë1, është duke qëndruar te shtëpia e së ndjerës, Hamide Magashi, ku ka marrë në prononcim motrën e saj të vogël, Shukrije Magashin.
Ajo tha se ndihet e kërcënuar nga i dyshuari.
“Vazhdimisht i ka thënë edhe nëse e marrë beben, prapë do të bëjë probleme, ose ty ose motrën e vogël. Gjithmonë i ka thënë motrës, do të rrezikoj edhe ty edhe familjen. Unë vet ndihem e frikësuar prej tij”, tha ajo.
Gazetarja e Tëvë1 e cila po qëndron te shtëpia e të ndjerës, tha se pak më parë ka kaluar një veturë e Policisë, mirëpo nuk është ndalur afër shtëpisë. Por policia është kontaktuar nga Tëvë1, të cilët kanë thënë se familja është duke u mbikëqyrur dhe nuk duhet të kenë frikë.
Nga PK-ja thanë se “zyrtarët tanë janë duke punuar intenzivisht për kapjen e të dyshuarit dhe të gjitha zonat që i kemi vlerësuar si senzitive janë duke u mbuluar nga ana e policisë”.
Të mërkurën rreth orës 18:00 është vrarë një grua e moshës 35-vjeçare para Klinikës së Gjinekologjisë në Prishtinë.
Hamide Magashi ishte shtatzëne dhe sipas të afërmeve të saj priste të lindte së shpejti. I dyshuari për vrasjen e saj është ish-bashkëshorti i cili ende nuk është arrestuar. /Teve1.info/
