Përmes një statusi në Facebook, kryetari i Komunës, Agim Aliu, ka shkruar se fushata e filluar ka për qëllim solidarizimin me bashkëqytetarët e zonave të prekura nga vërshimet dhe se po bëhet në bashkëpunim me Koordinatorin për Punë Sociale, Agon Zhinipotoku.
“Bashkë me qytetarët vullnetmirë, bizneset e dëshmuara solidare, sot në Ferizaj, nis fushata për grumbullimin e mjeteve financiare, veshmbathjeve e gjërave ushqimore kushtuar bashkëqytetarëve të zonave të vërshuara nga reshjet e jashtëzakonshme, ditë më parë në disa komuna të Kosovës e ndër më të goditurat, nga to është Komuna e Skenderajt.
Komuna e Ferizajt, përmes Koordinatorit për Punë Sociale, Agon Zhinipotoku, do ta bart këtë organizim, andaj ftojmë bizneset e qytetarët vullnetmirë që të kontribojnë për bashkëqytetarët tanë, duke kontaktuar drejtpërdrejt Koordinatorin për Punë Sociale, Agon Zhinipotoku, të caktuar nga ana ime.
Bashkë ringrihemi!”, ka shkruar Aliu.
