”Qohna luj me të, e ai hiq veç kaniherë kamën e livrit”
Para Spitalit Pediatrik të Qendrës Klinike Universitare të Kosovës po qëndron nëna e Elvis Hasanit.
Ibadete Muja Hasani po pret lajme për gjendjen e të birit që i ishte aksidentuar më 10 gusht.
Ashtu siç thotë ajo, 10 vjeçari, nga komuniteti Ashkali, ishte goditur nga një veturë në Bresje të Fushë-Kosovës, ndërsa kthehej me biçikletë në shtëpi.
“Djali është dalë në mëngjes të dielën me bicikletë me lujt, edhe djali ka lakmu me shku me bicikletë, i ka kalu semaforat në Bresje ka osht kthy me ardh në shpi i ka mshu vetura në ora 9 mëngjes”, tregon ajo.
Pas aksidentit, sipas saj, djali i ishte transferuar fillimisht në Emergjencën e QKUK-së, dhe më pas në Njësinë e Kujdesit Intensiv Pediatrik.
Ajo thotë se Elvisi që dy javë është i pavetëdijshëm, pa lëvizshmëri në anën e djathtë të trupit dhe me dëmtime serioze në tru.
“Djali është konë dy javë ditë në Intensivë, as dorë, as kamë, nuk është i lëvizshëm, as vetëdije as kurgjo. E që dy ditë e kanë qitë në këtë spitalin tjetër djali apet osht i njejti mjekët po e kqyrin e krejt ma ronë nuk ka”, tregoi nëna e Elvisit.
Por thotë se nuk kanë marrë asnjë informacion të qartë për hetimin e aksidentit.
E sa i përket barnave ajo thotë së i blen të gjitha vetë.
“E ka marrë tjetër kush me kerr, e ka pru këtu në Emergjencë, ai nuk u lajmru mo, kurrfarë lajmi për to nuk kemi marrë, une kom qef me dit ku osht, se kur jemi ardhë në Emergjencë, Policia ka thonë që e kemi qu ne burg e tash nuk e dimë a është në burg…për barna e për terapi e per sene qe dy javë su lajmëru, për tretën javë hini djali kërkush lajm s’na tha, e as policia mo nuk kanë qenë më kanë thonë që vin po s’jon ardhë, nuk e di veq ja kom lon Allahut në dorë”.
Detaje lidhur me rastin kanë dhënë edhe Shërbimi Spitalor Klinik Universitar i Kosovës.
“Pas 17 ditësh qëndrimi në kujdes intensiv, më datë 27.08.2025 pacienti është transferuar në Repartin e Neurologjisë Pediatrike, me parametra vitale stabil, duke vazhduar trajtimin e nevojshëm dhe nën mbikëqyrje të plotë nga stafi shëndetësor. Klinika e Pediatrisë njofton opinionin publik dhe familjarët se fëmijës nuk i ka munguar asnjëherë kujdesi mjekësor, dhe mbetet nën përkujdesjen e pandërprerë të profesionistëve shëndetësorë të QKUK-së”, thanë nga ShSKUK.
Tëvë1 ka kontaktuar edhe Policinë e Kosovës. Të njëjtit në një përgjigje kanë bërë të ditur se personi i dyshuar që ka shkaktuar aksidentin është intervistuar.
Ndërkaq, sipas PK-së, lënda tashmë i është përcjellë Prokurorisë Themelore në Prishtinë.
“Si pasojë e aksidentit, drejtuesi i biçikletës mashkull kosovar ka marrë lëndime të rënda trupore dhe është duke marrë tretman mjekësor në QKUK. Rasti është duke u hetuar. Lidhur me aksidentin ,personi i dyshuar është intervistuar nga ana e Policisë dhe lënda është përcjellë në Prokurori për veprime të mëtejme”, thanë nga Policia e Kosovës.
Por nga Prokuroria thanë për televizionin se një rast të tillë nuk e kanë pranuar.
“Ju njoftoj se lidhur me pyetjet të cilat i keni parashtruar, kemi verifikuar se në sistem nuk është pranuar në Prokurori rasti në fjalë”, deklaroi zëdhënësja e Prokurorisë Themelore në Prishtinë, Kaltrina Shala.
Pas përgjigjes së Prokurorisë, televizioni i ka dërguar pyetje Policisë për një sqarim shtesë të situatës, por të njëjtit nuk janë përgjigjur deri në publikimin e kronikës.
Kronikë e realizuar nga gazetarja, Jona Kelmendi.
