Zyra e Medias e Qeverisë së Gazës deklaroi se të paktën 15 persona, përfshirë 10 fëmijë dhe tre gra, u vranë nga forcat izraelite në një sulm që e përshkroi si një “masakër brutale dhe të tmerrshme” ndaj një pike mjekësore në qytetin Deir el-Balah, në pjesën qendrore të Rripit të Gazës.
Sipas deklaratës së shpërndarë në Telegram, pika mjekësore po ofronte ndihmë ushqimore dhe mjekësore për gra dhe fëmijë të sëmurë, si pjesë e përpjekjeve për të përballuar krizën humanitare që ka prekur mbi 1.1 milion fëmijë në Gaza.
Zyra akuzoi ushtrinë izraelite për vrasje të qëllimshme të civilëve dhe për goditjen e zonave të populluara e tregjeve të mbushura me njerëz.
“Sulmi i drejtpërdrejtë ndaj një objekti mjekësor humanitar përbën një shkelje të rëndë të ligjeve ndërkombëtare dhe humanitare dhe dëshmon për krimet e vazhdueshme të okupimit kundër civilëve të pambrojtur,” thuhej më tej në deklaratë, ku i bëhej thirrje bashkësisë ndërkombëtare që të mos heshtë përballë kësaj tragjedie.
Ndërkohë, Mbrojtja Civile e Gazës ka njoftuar se aktualisht nuk ka më mjete të nevojshme për të kryer operacione shpëtimi, veç një kamioni të vetëm zjarrfikës që ndodhet në Gaza dhe në provincat veriore të saj, ka raportuar Al Jazeera.
Në deklaratën e saj, organizata theksoi se pjesa më e madhe e automjeteve emergjente janë shkatërruar ose nuk mund të riparohen për shkak të mungesës së pjesëve rezervë.
Gjendja është po aq alarmante edhe në provincat jugore si Deir el-Balah, Khan Younis dhe Rafah, ku vetëm tre nga gjashtë kamionët zjarrfikës dhe dy nga gjashtë ambulancat janë ende funksionale.
Mbrojtja Civile kërkoi ndihmë urgjente nga bashkësia ndërkombëtare, duke paralajmëruar se pezullimi i këtyre shërbimeve ndodh në një moment kur sulmet izraelite janë intensifikuar dhe hapësirat e ashtuquajtura “humanitare” po zvogëlohen gjithnjë e më shumë.
