Shkalla e parë e gjyqësorit e tha fjalën e saj për rastin e “veteranëve” të hënën.
Aktgjykimi dënues përfshin burgim një vjeçar për dhjetë të akuzuarit që ishin pjesë e Komisionit Qeveritar për Njohjen dhe Verifikimin e Statusit të Veteranit të UÇK-së dhe obligim për qeverinë që të krijojë një komision për të verifikuar 19 mijë e 500 veteranët.
Veprimet e Qeverisë në lidhje me këtë çështje, do të shihen atëherë kur ky aktgjykim të bëhet i plotfuqishëm.
“Mekanizmi qeveritar është një proces administrativ dhe duhet të bëhet verifikimi, dhe të dilet me listën siç e ka obliguar Gjykata. Po flas nëse vendimi i shkallës së parë, merr formën e prerë. Atëherë Qeveria ka afat 1 vjeçar, që ta përfundoj këtë proces. Pas kësaj, natyrisht, gjitha palët e paknaqura pastaj në procedura administrative mund të kërkojnë të drejtën e tyre”, ka thënë avokati Ardian Bajraktari.
E nëse ky aktgjykim kalon filtrin e shkallëve tjera të gjyqësorit, pritjet janë që Qeveria ta përmbushë obligimin e saj.
“Në kuptim të përgjegjësive të Qeverisë, ka qenë edhe premtim i ish kryeminsitrit Kurti, në kohën kur ka filluar mandatin, që do ta bëjë verifikimin e do të përcaktojë kriteret, apo edhe andamentimin e ligjit, për të eliminuar të gjithë ata veteranë të cilët janë të rrejshëm, janë falco”, ka thënë avokati Xhevdet Smakiqi.
Agim Çeku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Fadil Shurdhaj dhe Xhavit Jashari u shpallën fajtor dhe u dënuan me nga 1 vjet burgim efektiv. Kurse, nga akuzat u liruan Nuredin Lushtaku dhe Smajl Elezaj.
