Nënkryetari i Komunës së Preshevës, Ragmi Mustafa, ka deklaruar se Qeveria e Kosovës ka pasur mjaftueshëm kohë që mjetet prej 1 milion euro t’i alokoj në Komunën e Preshevës.
Sipas tij 2 milion euro të këtij viti të dedikuara nga Qeveria e Kosovës për shqiptarët e Luginës nuk do të mund të zbatohen sikur ato të vitit paraprak.
“Në këtë drejtim Qeveria e Kosovës ka pasur kohë të mjaftueshme që këto mjete t’i alokoj në Komunën e Preshevës dhe Komuna e Preshevës të marr gjithë ato lënda nga Këshilli Kombëtar dhe të bëj shpërndarjen e mjeteve atje ku janë dedikuar nga Qeveria e Kosovës. Mirëpo nuk kam informacion pse këtë nuk e ka bërë kushdo që është përgjegjës për zbatimin e këtij transferi por transferi nuk ka ndodhur dhe në këtë drejtim janë 2 milion euro të pa shpenzuara njëlloj si vitin 2023 që 2 milion euro kishin mbetur pa përdorur fare edhe pse ishin në linjën buxhetore të Qeverisë së Kosovës për shqiptarët e Luginës së Preshevës dhe edhe këto 2 milion euro tani të vitit 2024 sigurisht se nuk do të mund të zbatohen sepse kanë mbetur vetëm disa ditë para përfundimit të vitit”, ka thënë ai në emisionin “Ditari”, në Tëvë1.
Qeveria e Kosovës në mbledhjen elektronike të saj që është mbajtur më 24.12.2024 ka ndarë një shumë prej mbi 1 milion euro për familjet shqiptare në Preshevë, Medvegjë dhe Bujanoc, që në mënyrë aktive merren me bujqësi.
“1,108,529 Euro mbështetje për të gjitha familjet shqiptare nga Preshevë, Medvegjë dhe Bujanoc qё nё mënyrë aktive merren me bujqësi sipas thirrjes publike të Këshillit Kombëtar Shqiptar (KKSh), përfshirë këtu financimin për programet nga thirrja publike e KKSh-së për avancimin dhe socializmin e fëmijëve me nevoja të veçanta”, thuhet në njoftimin e Qeverisë së Kosovës, më 25.12.2024./teve1.info/
