Në shumë vende të botës sot nisën festimet e 1 Majit me marshime dhe protesta të mëdha, duke u fokusuar në kërkesat për përmirësim të kushteve të punës dhe frikën nga një pasiguri ekonomike globale.
Festa, e njohur edhe si Dita Ndërkombëtare e Punëtorëve ose Dita e Punës, shënon përpjekjet dhe arritjet e punëtorëve dhe të lëvizjes punëtore.
Mijëra njerëz pritet të marrin pjesë në tubime e marshime në gjithë SHBA-në, Azinë e Evropën.
Në shumë vende, politikat e Trump u përmendën si burim shqetësimi. Në Shtetet e Bashkuara, organizatorët thanë se mesazhi i tyre këtë vit përqendrohej në luftimin e axhendës së Trump që synon emigrantët, punonjësit federalë dhe iniciativat e diversitetit.
Në Japoni, kërkesat e pjesëmarrësve ishin të gjera dhe përfshinin paga më të larta, barazi gjinore, kujdes shëndetësor, ulje të shpenzimeve ushtarake dhe ndihmë në rast katastrofe për viktimat e tërmetit. Ata gjithashtu kërkuan një armëpushim në Gaza dhe fundin e pushtimit të Ukrainës nga Rusia.
Në Manila, mijëra punëtorë filipinas marshuan pranë pallatit presidencial, ku policia bllokoi hyrjen me barrikada. Protestuesit kërkuan paga më të larta dhe mbrojtje më të fortë për vendet e punës dhe bizneset lokale.
Në Indonezi, rreth 200,000 punëtorë pritej të merrnin pjesë në marshimet e 1 Majit në të gjithë ekonominë më të madhe të Azisë Juglindore, sipas Said Iqbal, president i Konfederatës së Sindikatave Indoneziane. Ata po kërkojnë dhënien fund të rregullave të outsourcing-ut, rritjen e pagave dhe mbrojtjen e punëtorëve vendas dhe punëtorëve migrantë jashtë vendit, tha Iqbal.
Los Anxhelosi pritet të presë një nga ngjarjet më të mëdha në botë për 1 Majin këtë vit, dhe një banderolë atje përmblidhte temën e ditës: “Një luftë, një luftë – Punëtorët bashkohen!”
“Po e ngremë luftën kundër miliarderëve dhe politikanëve që po përpiqen të na ndajnë me frikë dhe gënjeshtra. Ne e dimë të vërtetën – një sulm ndaj punëtorëve emigrantë është një sulm ndaj të gjithë punëtorëve”, tha në një deklaratë April Verrett, presidente e Unionit Ndërkombëtar të Punonjësve të Shërbimeve, i cili përfaqëson 2 milionë punëtorë.
Edhe në Kosovë pritet të mbahen protesta ku motoja kryesore do të jetë “kundër padrejtësive ekonomike e shoqërore”. Pjesë e kërkesave do të jetë edhe kërkimi i një kostoje më të ulët të energjisë dhe paga më të dinjitetshme.
