Ai theksoi se Qeveria e Kosovës ka qenë e para që ka përmbushur mandatin e plotë që nga shpallja e pavarësisë.
“Qeveria jonë ka qenë e para që ka përmbushur mandatin e plotë që nga shpallja e pavarësisë. Kjo i ka kontribuar stabilitetit institucional dhe zhvillimit socio-ekonomik të vendit, përkundër gjitha sfidave globale që kemi përjetuar nga viti 2021 e tutje,” ka shkruar Kryeziu në Facebook.

Duke përmendur pandeminë, krizën energjetike dhe luftën në Ukrainë, Kryeziu tha se veprimet e Qeverisë kanë qenë gjithmonë ligjore dhe në funksion të stabilitetit.
“Veprimet tona, të ligjshme dhe kushtetuese, përgjatë gjithë kohës kanë qenë në shërbim të eliminimit të vatrave të destabilitetit me qëllim garantimin e stabilitetit të qëndrueshëm dhe afatgjatë,” tha ai.

Ai shtoi se në Kosovë ka sundim më të madh të ligjit dhe luftë kundër krimit dhe korrupsionit, duke e cilësuar stabilitetin e kaluar si “të rrejshëm”.
“Në Kosovë kurrë nuk ka pasur më shumë sundim ligji e luftim krimi e korrupsioni në gjithë territorin e Kosovës. Në të kaluarën, stabiliteti është synuar në kurriz të sundimit të ligjit dhe rendit publik, rrjedhimisht kemi pasur stabilitet të rrejshëm,” u shpreh Kryeziu.

Ai kujtoi edhe sulmet ndaj pjesëtarëve të KFOR-it dhe EULEX-it në maj të vitit 2023, si dhe sulmin në Banjskë në shtator të atij viti, duke e cilësuar Serbinë si burim të destabilitetit në rajon.

Lidhur me integrimin e komunitetit serb në Kosovë, Kryeziu theksoi se Qeveria e ka depolitizuar këtë proces.
“Ne e kemi depolitizuar integrimin e serbëve në shtetin e Kosovës. Vullneti i bashkëqytetarëve tanë për integrim nuk ka munguar asnjëherë. Por ai shpesh ka qenë i sfiduar e i shtypur nga struktura ilegale e grupe kriminale,” tha ai, duke shtuar se këto struktura janë zëvendësuar me institucionet e Republikës së Kosovës.

Në reagimin e tij, Kryeziu foli edhe për kritikat e kryeministrit ndaj Gjykatës Kushtetuese.
“Është qëndrimi i tij i hapur se me vendimet e saj, Gjykata Kushtetuese e ka cenuar karakterin demokratik të Republikës së pavarur, dhe se me joefikasitetin e saj në trajtimin e lëndëve është bërë bashkëpjesëmarrëse në agjendën e partive politike opozitare për të vonuar reformat themelore,” shkroi ai.

Megjithatë, ai ritheksoi mirënjohjen ndaj SHBA-së për mbështetjen e vazhdueshme.
“Ne i jemi gjithmonë mirënjohës për kontributin dhe angazhimin e Shteteve të Bashkuara të Amerikës për vendin tonë dhe i falënderojmë për mbështetjen dhe ndihmën ndaj shtetit të Kosovës dhe popullit tonë në aq shumë fusha. I mirëpresim edhe kritikat. Kurdo që janë konkrete përpiqemi maksimalisht të përmirësojmë dhe korrigjojmë hapat e veprimet tona,” përfundoi Kryeziu.

The post Reagimi i Qeverisë pas pezullimit të dialogut: SHBA mbetet aleati ynë strategjik, i mirëpresim edhe kritikat appeared first on TËVË 1 - Lexoje të vërtetën!.