Behramaj është i gatshëm që të punojë skulptura edhe të fëmijëve të tjerë të vrarë gjatë luftës së fundit në Kosovë.

“E përkrahi idenë, është shumë e mirë si iniciativë dhe dua të Leotrimi të jetë edhe para Kuvendit të Kosovës dhe të rrëfejë për historinë e vetë se si i ka ndodhur. Por, jo vetëm për historinë e Leotrimit po edhe të 1 mijë e 432 fëmijëve të tjerë që kanë rënë gjatë luftës. Unë jam i gatshëm plotësisht që ta punoj edhe një herë Leotrimin, jo vetëm në oborrin e  Kuvendit të Kosovës po në çdo venë ku dëshmohet historia e vërtetë e Leotrimit dhe shumë Leotrimave të tjerë në Kosovë”, tha ai në emisionin “Ditari” në Tëvë1.

Behramaj, i cili me paratë nga buxheti familjar e realizoi skulpturën e Leotrimit, thotë se punimi i saj i merr kohë vetëm një muaj e gjysmë.

“Jam i gatshëm në çdo vend që kërkohet ta punoj dhe ta dërgoj, sepse Leotrimi përfaqëson një histori shumë të dhimbshme dhe dua që të mos harrohet historia dhe të ruhet e t’i kujtohet të gjithëve se çfarë ka ndodhur me Leotrimin dhe me shumë fëmijë të tjerë në Kosovë. Mua më merr kohë vetëm një muaj e gjysmë, derisa ta finalizoj”, deklaroi Behramaj.

Ai ka bërë të ditur se i ka bërë kërkesë edhe kryeministrit të Shqipërisë, Edi Rama, që Leotrimin ta dërgojë edhe në Tiranë, ku edhe atje ta tregojë historinë për gjeneratat e tij.

“Tirana ka hapësira të mjaftueshme dhe kudo që ta vendosin për mua është në rregull, në ndonjë vend sidomos ku frekuentohet prej njerëzve dhe shihet më mirë”, deklaroi skulptori.

Gjatë ditës së sotme, Lidhja Demokratike e Kosovës (LDK) ka dorëzuar kërkesë zyrtare për vendosjen e shtatores së Leotrim Ahmetit, 7-vjeçarit të vrarë nga forcat serbe më 1998, në oborrin e Kuvendit të Kosovës.

Kërkesën për vendosjen e shtatores së Leotrimit e ka dorëzuar deputeti i LDK-së, Driton Selmanaj.

7-vjeçari gjatë luftës u plagos në oborrin e shtëpisë së tij në Rezallë të Skenderajt, ndërsa ndërroi jetë në spitalin ushtarak në Gradicë të Drenasit.

8 muaj pas vrasjes së Leotrimit, në vijën e parë të frontit të luftës, heroikisht ra edhe babai i tij, komandant Malush Ahmeti./teve1.info/

The post Skulptori përkrahë idenë e LDK-së për vendosjen e shtatores së Leotrimit në oborrin e Kuvendit appeared first on TËVË 1 - Lexoje të vërtetën!.