Megjithatë, donacioni arab prej 22 milionë eurosh nuk arriti të vihej në funksion deri të 197-tën ditë pas përurimit.
Njëri prej investimeve më të mëdha në shëndetësinë e pasluftës, po vazhdon të ballafaqohet me probleme edhe pas funksionalizimit.
Kështu, nga katër salla të operimit janë funksionalizuar vetëm dy.
Sipas drejtorit të kësaj klinike Ardian Shefkiut, kjo ka ndodhur si pasojë e mungesës së stafit.
“Ne faktikisht i kemi 4 salla efektive po në ato salla është planifikuar të vjen Ortopedia, Kirurgjia Plastike e Neurokirugjia. Ne i kemi dy salla të Kirurgjisë Elektive funksionale. Njërën prej këtyre sallave po e shfrytëzojmë edhe për Emergjencë edhe pse e kemi Sallën e Emergjencës e cila është e veçantë në katin e parë”, tha ai.
Në Klinikën Kirurgjike-Pediatrike që është vendosur në këtë Spital, mjekët nuk kanë ambiente të mjaftueshme për akomodim, të cilat janë të nevojshme pas operacioneve të shumta.
“Kam bo një ankesë me të drejtë sepse nuk kemi pas ambiente të mjaftueshme. Kemi ardhë në një objekt të ri. Nuk janë kanë me kohë të caktume, definume kush çka ka, sepse këtu ka edhe klinika tjera. Edhe unë jam i pakënaqur, unë s’kam një zyrë, s’kam një vend të administratës por jemi në ristrukturim thashë”, ka thënë.
Ashtu si edhe në klinikat tjera, edhe në Kirurgjinë Pediatrike mungojnë barna.
“Jemi mjaftueshëm të furnizum, por mungesat janë si në të gjitha klinikat ashtu edhe te ne. Realisht kemi pas në vazhdimësi problem me furnizim por barnat që janë bazike pothuajse shumicën e kohës që jemi janë.
Veç këtyre, televizioni mëson se në këtë spital ende nuk kanë hyrë në funksion aparaturat e CT-së dhe rëntgenit, për shkak të mungesës së stafit në shërbimin e Radiologjisë.
Televizioni për këto çështje gjatë së enjtes ka provuar të flasë edhe me menaxhmentin, por drejtori i ShSHKUK-së, Valbon Krasniqi nuk është përgjigjur në pyetjet e as thirrjet e televizionit. Teksa zëdhënësi Shpend Fazliu ka thënë se ka qenë i zënë.
Në spitalin Sheikha-Fatime përveç kirurgjisë pediatrike, janë të vendosura edhe ambulancat specialistike e emergjente kirurgjike, emergjenca pediatrike, shërbimet e sterilizimit etj.
Kronika e realizuar nga Gojart Jashari