Departamenti i Gazetarisë gjatë ditës së martë ka mirëpritur gazetaren nga Irani, Yasamin Molana.
Ajo mbajti një ligjëratë për studentët rreth realitetit mediatik në vendin e saj dhe sfidave të punës si gazetare në një shtet autoritar.
Gjatë prezantimit, gazetarja iraniane shpjegoi se në Iran mediat private janë të jashtëligjshme, ndërsa e vetmja media kombëtare është Islamic Republic of Iran Broadcasting (IRIB), e cila financohet dhe kontrollohet plotësisht nga udhëheqja e lartë e vendit.
“Sot Irani ka një organizatë të quajtur Islamic Republic of Iran Broadcasting (IRIB), që është media kombëtare, plotësisht e financuar nga shteti, dhe drejtohet nga udhëheqja e lartë e vendit. Nuk ka kanale private pasi nuk janë të ligjshme. Prandaj pothuajse të gjithë përmbajtjet mbështeten në identitetin kombëtar, programet fetare, mesazhe politike dhe lajme të brendshme në përputhje me narrativën e shtetit. Dhe programe familjare për argëtim”, tha Molana.
Në këto rrethana, ajo tregoi se mediat në Iran nuk e kanë raportuar sulmin kibernetik që Irani kishte bërë ndaj Shqipërisë në vitin 2022.
“Jo, absolutisht jo. Ata zakonisht nuk publikojnë informacione të tilla. Sot e kësaj dite nuk është e qartë në opinionin publik botëror nëse ishte vërtet Irani apo jo. Dhe gjithashtu, Irani asnjëherë nuk ka folur për këtë”, shtoi ajo.
Duke folur për sfidat e të qenit gazetare grua, Molana theksoi se rreziku për gazetarët është i njëjtë si për burrat, ashtu edhe për gratë, por diskriminimi mediatik ndaj grave mbetet i dukshëm.
“Në fakt, nuk ka shumë ndryshim mes gazetareve gra dhe burrave në Iran. Nëse ka ndonjë kërcënim për gazetarët, është i njëjtë për të dy palët. Por një tjetër problem është që zërat e grave nuk dëgjohen. Kam intervistuar atlete elitarë të suksesshme ndërkombëtarisht, por ato nuk shfaqen në TV. Trupi i grave është ‘vijë e kuqe’. Edhe me mbulesë islame, përsëri nuk transmetohen sepse ‘trupi është vijë e kuqe’. Prandaj nuk i transmetojnë garat e tyre. Në lajme vetëm përmendin shkurt sukseset e tyre, dhe kaq. Nuk tregojnë as trajnerë meshkuj, sepse kjo do të shkaktonte debat”, shpjegoi ajo.
Ajo është gjithashtu kandidate për doktoraturë në Komunikimin Mjedisor në një universitet në Itali, e për këtë Molana tha se ka marrë paralajmërime nga akademikë ndërkombëtarë për rrezikshmërinë e studimit të çështjeve mjedisore në Iran.
“Disa ditë më parë, mendoj në tetor, kisha një takim online me profesoreshë nga Akademia e Lindjes së Mesme në Suedi. Ajo më pyeti: ‘A nuk është e rrezikshme për ty të studiosh këtë fushë?’ Sepse çështjet e krizës mjedisore prekin burimet natyrore, që janë shumë politike në rajonin tonë. I thashë: ‘Dikush duhet ta bëjë. Dikush duhet të informojë, qoftë akademikisht, qoftë si gazetar.’”
Një fakt tjetër që befasoi studentët ishte pagesa mujore e gazetarëve në Iran, e cila arrin vetëm rreth 20 euro, pasi gazetaria nuk konsiderohet profesion zyrtar.
E në këtë konferencë, studentët e pranishëm patën mundësi t’i adresonin pyetje të ndryshme gazetares iraniane.
